29.01.2014 Близу 1 милион и 300 илјади денари планира да потроши Локалната самоуправа за најавената реконструкција на градскиот стадион во Кочани.
Веќе е објавен огласот за избор на изведувач на градежните работи, а пријавувањето на заинтересираните компании е до 10 февруари.
Според тендерската документација опфатени се неколку позиции на кои треба да се работи, при што главно место има реконструкцијата на подтрибинскиот дел, односно соблекувалните и другите помошни простории. Освен тоа се предвидува да се санираат тоалетите за публиката, како и да се постават нови алуминиумски стативи за головите и метален јарбол. Дополнително на влезот на стадионот ќе бидат поставени нови врати, а ќе се оспособат и кабините за спортските коментатори.
Инвеститорот на располагање нема долг период за реализирање на планираната реконструкција, затоа што во план е уште пролетва градскиот стадион да се оспособи за одигрување фудбалски натпревари од меѓународен карактер. Според најавите, се очекува во април Кочани да биде домаќин на женските фудбалски репрезентации на Македонија и Шпанија, а еден месец подоцна кај нас да гостува и репрезентацијата на Италија.
- Мислам дека се ќе биде во најдобар и ред и граѓаните на Кочани, покрај машкиот репрезентативен фудбал што пред 20-тина години се играше овде, да видат за првпат и една репрезентација што ќе дојде и да го претстави во најдобро светло и нашиот град и развојот на женскиот фудбал во Македонија и пошироко, рече Владо Андов, координатор на женските фудбалски репрезентации на Македонија.
Последните градежни зафати на стадионот “Никола Мантов“ беа направени во почетокот на 90 години кога се изгради и покри западната трибина. И тогаш реконструкцијата помогна во Кочани да гостуваат странски фудбалски репрезентации, односно младинците од нашата држава играа против своите врсници од Данска, Кипар и Турција.
Т. Ајтовски
©2013 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
{youtube}
|700|525|0{/youtube}