28.09.2018 Во конкуренција од 12 преубави девојки на традиционалниот избор на жетварска убавица, жири комисијата имаше тешка задача да ја избере најубавата.
Престижната титула жетварска убавица на Кочани за 2018 година ја понесе 17-годишната Марија Симеонова од Кочани, ученичка во СОУ „Љупчо Сантов“.
- Многу сум задоволна и среќна што ја понесов оваа титула Жетварска убавица на Кочани за 2018 година. Прв пат учествувам во оваа манифестација и не ја очекував наградата, рече Марија Симеонова, жетварска убавица на Кочани за 2018.
За прва придружничка на жетварската убавица беше избрана Вања Дојчинова, а за втора Благица Христоска.
Изборот на жетварската убавица претставува своевиден уметнички перформанс преку кој се прави спој на традицијата и современото, спој на музиката, убавината и младоста. Во музичко-забавниот дел на изборот учествуваа членови на танчарската школа „Ит д` бит“ на кочанецот Илија Карадакоски и танцовиот клуб „Степ ап“ од Битола.
Трите најубави жетварки ќе учествуваат во обичајот зажнејување што во присуство на делегации од повеќе држави и амбасади ќе се изведе в сабота, 29 септември, на нива во Институтот за ориз во Кочани.
Во рамките на манифестацијата „Денови на кочанскиот ориз“ в петок се одигруваат натпревари од турнирот во баскет, а настапуваат Ouroboros, Драган Теодосиев квартет, Sethstat и Мирко Попов, како и тетовскиот музички состав Conquering Lion.
Т. Велкова