02.10.2018  Повторно се зголемува бројот на интервенции на пожарникарите од ТППЕ - Кочани откако земјоделците започнаа да ги палат остатоците од ожнеаните жита во нивите.

Три хектари земјоделско земјиште засеано со пченка и други земјоделски култури се уништени од пожар во атарот на кочанското село Мојанци.

Од Tериторијалната противпожарна единица во Кочани потврдија дека поради силниот ветер огнот брзо зафатил поголема површина, а пожарникарите што учествувале во гаснењето по два часа успеале да го стават под контрола и да спречат проширување кон блиските куќи.

Токму во овој период од годината вообичаена практика на земјоделците од регионот е да ги палат стрништата и сувата слама во нивите со што се загрозува општата безбедност, се загадува животната средина, а често се прави и материјална штета на туѓ имот. Тоа е причината и за пожарот кај Мојанци во кој изгореа ниви од кои се уште не е собран родот. Пожарникарите ги потсетуваат несовесните граѓани на законската забрана за палење оган на отворен простор, за што се предвидени и високи парични казни.

Слична интервенција пред неколку дена екипи на ТППЕ – Кочани имале и во атарот на селото Теранци каде, по проширувањето на огнот од нивите, изгорел помошен земјоделски објект.

Само во текот на месец септември кочанските пожарникари имале 35 гаснења пожари на земјоделски површини. Со оглед што жетвата на оризот е во ек, тие во просек веќе имаат по две излегувања на терен дневно, поради што најверојатно во октомври ќе биде регистриран двојно поголем број интервенции.

Т. Ајтовски