06.12.2018  Од почетокот на оваа учебна година до крајот на ноември од основните и средните училишта во општина Кочани се отпишале 20 ученици, за кои родителите навеле дека причината е иселување во странство.

Овој број е на слично ниво како за првото тримесечје минатата година, иако регистрирана е тенденција на зголемување на отпишаните ученици пред почетокот на учебната година, односно за време на летниот и зимскиот училишен распуст.

Ваквите податоци ја илустрираат тенденцијата за ислување на граѓаните, што според анализата за состојбата во Источниот регион го става Кочани веднаш зад Штип, каде што бројот на отпишани ученици заради заминување во странство е нешто над 40.

Според анализите на Одделението за јавни дејности на Општина Кочани, секоја учебна година стартува со околу трисетина ученици помалку со сите одделенија во општинските образовни институции. Иако училиштата не водат прецизна евиденција за причините за нивно отпишување, искуствата покажуваат дека најчесто тие своето образование го продолжуваат надвор од нашата држава.

За првите три месеци од оваа учебна година најголем број отпишани ученици шестмина петмина се регистрирани во средното општинско училиште “Гошо Викентиев“ , а пет во основното „Св. Кирил и Методиј“. Во средното „Љупчо Сантов“ и основното „Никола Карев“ има двајца, а во другите основни училишта се евидентирани по еден отпишан ученик. Практично за неполно полугодие недостасува цела една паралелка. Сите ученици како причина за напуштањето на образованието навеле дека заедно со семејствата се иселуваат во странство.

Освен заминувањето во странство, во евиденцијата на кочанските училишта е забележано дека просечно годишно уште триесетина ученици се отпишуваат заради префрлање во образовни институции во други градови во Македонија.

T. Aјтовски