21.01.2019  Локалната самоуправа на Кочани ги започна проектните активности за изградба на мини акумулација на Осоговските Планини за водоснабдување на туристичкиот центар Пониква.

Во тек е постапката за избор на фирма што ќе ги направи истражните геотехнички испитувања и ќе изработи основен проект за браната, а за што од општинскиот буџет е планирано да се потрошат близу 2,2 милиони денари. 

Мини акумулацијата ќе биде лоцирана во месноста Арамиска чешма, во непосредна близина на Пониква и главна цел е да обезбедува вода за постојните и новите викендички во населбата, за одморалиштата, како и за планинските поила за сточниот фонд.

Вкупниот капацитет на браната е планиран на околу 52 илјади кубни метри вода, а височината на насипниот преграден ѕид е 19,5 метри. Освен за водоснабдување, таа ќе треба да обезбедува и вода за производство на вештачки снег.

Со оглед на специфичната локација на акумулацијата, за да се обезбедат доволни количини вода, освен постојниот поток, предвидено е да се изградат и три доводни канали со должина од 660 до 1.300 метри кои ќе опфаќаат дополнителна сливна површина.

Во моментот тече рокот за пријавување на заинтерсситраните проектанстски фирми, кои би ги воделе истражувачките работи на терен и би го изработиле идејниот и основниот проект. Пријавувањето на повикот трае до 7 февруари, а споре дусловите во спецификацијата проектната документација треба да биде изработена во период од седум месеци по потпишувањето на договорот со фирмата што ќе биде избрана на тендерската постапка. 

Т. Ајтовски