19.09.2018 Македонската развојна фондација за претпријатија и водечката организација „Care“ од Германија го спроведуваат проектот „Поддршка за развој на земјоделски задруги“. Проектот има за цел да придонесе кон поголема продуктивност и конкурентност на земјоделскиот сектор во земјата.
Специфичната цел на проектот е зголемување на пазарната конкурентност и соработката меѓу земјоделците во земјата, преку создавање поволни услови за развој на постоечките и создавање нови земјоделски задруги.
Информативна средба со земјоделците се одржа во општинската сала во Чешиново со цел претставување на предностите од здружувањето во земјоделски задруги.
19.09.2018 Дивите депонии и непланското и неселектирано исфрлање на отпадот беше тема на работилницата што се одржа во Кочани, а чиј организатор беше невладината организација “Зелен институт“ од Скопје.
Целта беше да се разгледаат предлози и идеи за изнаоѓање решенија за проблемот со отпадот и дивите депонии на територијата на општината.
Пред присутните беа претставени резултатите од спроведените анкети во неколку градови во државата, меѓу кои и Кочани, при што оценка е дека кај нас состојбата е нешто подобра во споредба со другите.
19.09.2018 Четворица повредени ученици и една опожарена училница е билансот од земјотресот, а по него и пожар што избувна утрово во ОУ „Раде Кратовче“, како дел од тактичко-показната вежба спроведена во ова училиште.
Со две возила на ТППЕ - Кочани кои пристигнаа во училиштето, кочанските пожарникари повторно уште еднаш ја покажаа подготвеноста при справување во вакви елементарни непогоди. Освен гаснење на пожарот, ги извадија на носила и сите повредени ученици.
Прва помош укажаа екипи од ОО на Црвен крст - Кочани, а од раководството на училиштето изразија голема благодарност до сите учесници во вежбата. Заклучокот е дека ОУ „Раде Кратовче“ е подготвено да ги евакуира сите ученици и вработени при вакви непогоди.
18.09.2018 Претседатели на општинските организации и членови на НСДП од регионот на изборната единица број 3 во понеделникoт вечерта се собраа на партиска трибина во Кочани, за да ги разгледаат прашањата околу претстојното референдумско изјаснување, како и за внатрепартиски прашања.
Од името на домаќините на почетокот од средбата присутните ги поздрави Сашко Стефановски, претседател на општинската организација на НСДП од Кочани, а потоа се обрати претседателот на партијата, Тито Петковски.
Тој рече дека изјаснувањето на претстојниот референдум е од клучно значење за натамошното опстојување на Македонија како држава, поради што е неопходна национална хомогеност и обединување на сите граѓани кои живеат во неа.
19.09.2018 Повторно нова серија на малтретирање кучиња во Кочани. На истата локација во подрумските простории кај зградите кај панаѓурот Здружението за заштита на животните од Кочани повторно најде и ослободи изгладнети, измалтретирани и дехидрирани врзани кученца.
Од Здружението пак, се сомневаат на Николчо Тeрџиманов кој живее во истата зграда и за кој Канал 8 досега неколку пати информираше.
За новото малтретирање Здружението ја извести и полицијата и ветеринарните инспектори.
- Откако излезе од затвор Николчо повторно продолжи со истото темпо на собирање и малтретирање кучиња. Во подрумските простории на зградите кај панаѓурот најдовме нови кученца.
18.09.2018 Две деца и три возрасни лица од Виница завршија на инфективното одделение во Клиничката болница во Штип по констатирано труење со храна.
Затруените се пожалиле на болки во стомакот, мачнина и повраќање заради што побарале лекарска помош, а поради лошата здравствена состојба веднаш добиле инфузија и неопходни лекарства.
Како причина за труењето лицата го навеле консумирањето торти и колачи од слаткарски дуќан во Виница, на кој по извршениот инспекторски надзор му било издадено решение за забрана за работа.
17.09.2018 Кочани е првата општина во Македонија во која започна да се реализира проектот мобилен сервис за грижа во домашни услови. Со него жителите од руралните подрачја треба да добијат подобра здравствена и социјална заштита.
Носители на проектот, што се разработуваше неколку месеци, се министерствата за здравство и за труд и социјална политика. Партнер е локалната самоуправа на Кочани, а финансиската поддршка е на УНДП.
- За првпат се имплементира еден европски модел на здравствена услуга што жителите од руралните места во регионот ќе ја добиваат во нивните домови.
14.09.2018 Карaванот на Фестивалот на поезија за деца „Стихувалки“ 2018 стигна и во Кочани. Пред кочанската публика претставени песните кои се собрани во Збирката на поетски творби „Стихувалки“ а во која учествуваат и две наши сограѓанки Марина Гоцевска и Јованка Ефтимова.
Нивните песни припаднаа во групата од 49 најдобри кои се дел од оваа „Стихувалка“.
Освен песните за двете кочанки кои се дел од збирката Марина Гоцевска влезе во финалето на фестивалот и се најде меѓу најдобрите 25 од сите пријавени за учество.
05.09.2018 Пет македонски текстилни компании учествуваат на меѓународниот саем за облека што од 4 до 6 септември се одржува во германскиoт град Минхен.
Меѓу учесниците е и кочанската конфекција “Метас“, како единствен претставник од нашиот град, која се претставува со својата производна програма на кошули.
Учеството на македонските компании на саемот е со поддршка од Агенцијата за странски инвестиции и промоција на извозот, и тоа е одлична можност тие да ги претстават сопствените инвестициски потенцијали на европскиот и поширокиот меѓународен пазар.
Тактичко-показна вежба за евакуација и спасување во случај на пожар во ОУ „Синиша Стоилов“ - Зрновци
13.09.2018 Едно возилo на Тертиторијалната противпожарна единица на Кочани со спремните пожарникари беше доволно да се изгасне пожарот во ОУ „Синиша Стоилов“ кој како дел од вежбовната активност избувна во училиштето.
Од симулираниот пожар беа зафатени неколку училници и беа повредени тројца ученици кои навреме беа евакуирани од пожарот и од страна на екипите и волонтерите од ОО Црвен крст - Кочани им беше укажано прва помош.
Евакуацијата и симулацијата на пожарот се спроведе со учество на сите вработени во училиштето и учениците. Од вежбата се покажа дека ОУ „Синиша Стоилов“ од Зрновци како и ТППЕ на Кочани се подготвени за брза реакција при евентуална несреќа и справување во случај на пожар.
